الأربعاء، 15 يونيو 2011

عودٌ ربما يكون أحمد ..


(قبل البداية: لو مكانش خطر على بالك القلشة السخيفة بتاعة "هو عود أحمد ولا محمد" أديني قلتهالك، فمفيش داعي تقولهالي بقى)

مدخلتش هنا من قرون سحيقة .. لما فتحت المدونة كنت متحمس جداً اني هكتب كتير وعندي مشاريع وافكار كتير متنوعة وبلا بلا بلا، لكن نظرية (الفسسسسس الكبير) أدت عملها بكفاءة كالعادة، واللي حصل اني اكتفتيت بنقل وتجميع حاجات كنت ناشرها في اماكن اخرى وبسسس مكتبتش اي حاجة لا هنا ولا غير هنا .. مرت شهور من آخر مرة كتبت فيها أي حاجة أصلاً .. الانشغال في الحياة ومحاولات المذاكرة .. الثورة اللي اخدتني لفترة كبيرة للواقع الحقيقي بعيداً عن الواقع الانترنتي الافتراضي ..


واقعياً أنا عارف ان ده مش السبب .. انا مش عارف هو ايه السبب بالظبط .. دايماً كإني مشغول جداً إلى حد إن معنديش وقت أقرا ولا اكتب ولا اشوف افلام، ومش فاهم مشغول بالظبط في ايه .. لاحظت فقط اني لما باكون مفروض اعمل حاجة ما سواء على النت أو الواقع بالقالني باتفنن في تضييع وقت طويييل في لا شيء .. تحديث لهوم الفيس باستمرار، مشاهدة فيديوز على يوتيوب، اتكلم مع حد مش مهم على الماسنجر .. تقريباً وجود الدراسة والمذاكرة كعامل دائم في لاوعيي واني غالبا داخل النت وانا مستنى زعيق من بابا او ماما له دور ما في الأمر .. دائما ذاك الشعور ان الوقت مش ملكي واني لو بدأت مش هكمل .. بالاضافة لانه ربما حيلة نفسيه دفاعية من لاوعيي للهرب من بعض الضغط العصبي اللي بتمثله الكتابة احياناً .. مش عارف بقى ..

وبرضه عندي سوء تنظيم وقت رهييييب، ودائماً تأجيل عمل اليوم إلى الغد وما بعد الغد وما بعد بعد الغد، وده ينطبق على كل الاعمال تقريبا، سو دايما هناك كذا كتاب باقراهم على التوازي مخلصوش، ودايما هناك حاجات بدأت كتابتها ومكملتش، ودايماً هناك دروس بدات مذاكرتها وركنتها ..

المهم اني قررت انه إيناف إز إيناف بقى - على رأي الست ليفني .. نفتح صفحة جديدة ونجرب ..

لما دخلت المدونة بعد قرون من الغياب وقريت ما كتبت قبل كده من قصص حسيت انهم زبالة! .. انا كنت ناوي اعمل بوست كامل انقد فيه نفسي بس بعدين قلت بلاش عشان مافتحش عين الناس لو مش واخدين بالهم .. الامر اشبه باني لو اعرف حد مناخيره طويلة شوية وانا مش واخد بالي اصلا، ثم جه حد قالي عنه "هو مناخيره طويلة شوية بس برضه شكله حلو" .. كده كل ما اشوفه هاخد بالي من تلك الملحوظة وافكر فيها، وانا مكنتش قبل كده شايفها اصلا!
لذا الصمت احسن لكن تظل الحقيقة: لو حسيت ايها القاريء ان قصصي زبالة - بالذات اتنين منهم مش طايقهم اطلاااااااااااااااااااااقااااااا مش عارف ازاي كتبت كده اصلا - انا باقولك عندك حق :)

المدونة نفسها برضه حسيت ان كل حاجة فيها مش حلوة، لدرجة اوشكت على تغيير اسمها نفسه .. غيرت في شكل المدونة، ولسه قابلة للمزيد من التطور .. أدينا هنشوف .. المهم استديم عليها بقى .. عايز بعض النظام في حياتي زي ما شادي بيعمل .. وضعت خطة لحد ادنى من الاوقات الثابتة يوميا للمذاكرة والقراية والنت ومحاولات الكتابة ..

ياااااااااا رب

هناك 3 تعليقات:

  1. hانا لسه مخلصتش التدوينه
    بس لازم اكتب الكومنت دا
    اهووووووووووو يا جدعان في ناس زيي اهو بتحس انه دايما وراها حاجه فمش هينفع تمسك كتاب او تشوف فيلم او تعنل اي حاجه من الحاجات اللي دايما عنده مبرر ليها"مفيش وقت" لكن الحاجه اللي وراك اصلا مابتخلصش ومفيش تعارض مع انك تقعد تعمل ريفريش للفيس كل شويه فتكتشف انك ما استفدتش منه حاجه وضيعت الوقت وماخلصتش الل وراك
    والاكتشاف الاعظم انه دايما في وقت اومال انا دايما حاسس انه مفيش وقت ليييييييييييييه

    ردحذف
  2. ههههههههههههههههههههههههههههههههههههههه
    دا انا ضحكت حته ضحكه خلت امي كانت هتتديني على وشي على "زي شادي" :D:D:D

    المهم يابني انا خلصت التدوينه
    اند اي ام تيبكل تبيكل تيييبكل يو مما يرفع معنوياتي جدا..ليا الشرف والله يابني :D:D

    انا نسيت اقول على حكاية تنظيم الوقت دي في مميزات شادي
    نو كومنت..بسم الله ما شاء الله:|
    بحاول اتعلم منه والله بس موش نااااافع بتاتا
    قدامك اد ايه وتخلصي كذا..معرفش
    طب هو كذا يخلص في اد ايه المفروض..معرفش
    وهكذا :D:D:D:D:

    تفتكر في أمل..انا بعلق نفسي ان دا بسبب الدراسة وانه ان شاء الله اول ما اخلص دراسة الوضع هيتغير :'(

    محممممد..عود أحمد :))
    وماتغيبش تاني بقى :D

    ردحذف
  3. مشكوووور .. وتسلم ايديك على الموضوع الممتاز
    umzug-Transport
    Räumung-bookmarks

    ردحذف